Lögreglan í Buffalo í Bandaríkjunum leitar nú logandi ljósi að foreldrum þriggja ára drengs sem fannst sofandi ofan í pappakassa á verönd við heimili eitt í borginni. Lögregla telur ljóst að drengnum hafi verið komið þarna fyrir.

Lois Augsburger, konan sem fann drenginn, segir við WIVB að hún hafi fundið hann um átta leytið í gærmorgun. Kassann notar hún fyrir heimiliskettina sína. Búið var að vefja piltinum í teppi og þá var hann aðeins í bleyju.

„Hann hlýtur að hafa heyrt í mér þegar ég opnaði því hann skreið til mín. Ég tók hann í fangið og faðmaði hann að mér,“ segir Lois en drengurinn var við ágæta heilsu. Augsburger hafði samband við nágrannakonu sína sem vinnur við umönnun barna og þær höfðu síðan samband við lögreglu.

Pilturinn sagðist eiga systur og þegar hann var spurður um nafnið á móður sinni svaraði hann einfaldlega „mommy“. Lögregla hefur hvatt aðstandendur drengsins til að gefa sig fram.

Jeff Rinaldo, lögreglufulltrúi í Buffalo, segir það óvenjulegt að engin tilkynning hafi borist um barnið. Pilturinn er nú í umsjá barnaverndaryfirvalda í Buffalo.

Í frétt Buffalo News kemur fram að lögregla skoði nú hvort drengurinn tengist tveimur manneskjum sem fundust látnar í bifreið skammt frá sama kvöld. Líkin fundust í bifreið sem hafði verið kveikt í.