Samkvæmt skýrslu frá Air Accidents Investigation Branch má rekja nauðlendinguna til þess að flugstjórinn og flugmaðurinn fengu kaffi inn í flugstjórnarklefann. Flugmaðurinn sá um stjórn vélarinnar á þessum tíma. BBC skýrir frá þessu.
Þegar flugstjórinn fékk kaffi setti hann það á borð, sem er með standi fyrir kaffibolla, en skömmu síðar valt kaffibollinn á hliðina. Megnið af kaffinu helltist yfir klof hans en smávegis sullaðist yfir flugstjórnartækin hans sem hitnaði hratt í kjölfarið og takkar byrjuðu að bráðna. Þessi atburðarás breiddist síðan yfir í stjórntæki flugmannsins.
Bráðnuðu takkarnir hættu að virka og tjónið breiddist út og fjarskiptabúnaður vélarinnar varð einnig fyrir áhrifum. Vélin var langt úti yfir Atlantshafi á þessum tímapunkti en var snúið við og nauðlent í Shannon á Írlandi. Á leiðinni þangað fór að rjúka úr stjórntækjum vélarinnar og urðu flugmennirnir að nota súrefnisgrímur en gátu lent vélinni án vandræða.
Samkvæmt skýrslu rannsóknarnefndarinnar voru engar verklagsreglur í gildi hjá flugfélaginu um að lok ættu að vera á bollum. Því hefur nú verið breytt og á nú alltaf að nota lok á glös og bolla í flugstjórnarklefanum.
