Tvö dönsk börn létust nýlega af völdum E.coli bakteríunnar VTEC. Annað barnið bjó í Kaupmannahöfn en hitt á Fjóni. Málin tengjast ekki að sögn heilbrigðisyfirvalda sem skýrðu frá þessu í síðustu viku.

Á miðvikudag í síðustu viku lést barn, sem var í Gislev Friskole á Fjóni, af völdum bakteríunnar sem leiddi til þess að nýru barnsins gáfu sig. Í kjölfarið var skólanum og leikskóla á hans vegum lokað og fagfólk fengið til að sótthreinsa byggingarnar hátt og lágt.

E.coli smitast á milli fólks og með drykkjar- og baðvatni sem er saurmengað. Bakterían getur valdið blóðugum niðurgangi og miklum magaverkjum og leitt til blóðskorts og nýrnabilunar.

Á síðasta ári smitaðist 21 dani af bakteríunni og létust tveir.