Samsæriskenningasmiðir eru duglegir að koma auga á ótrúlegustu hluti og búa til kenningar – sem á köflum eru langsóttar. Melanie Trump, forsetafrú Bandaríkjanna, hefur verið nokkuð á milli tannanna á netverjum vegna myndar sem Donald Trump birti á Twitter.
Á myndinni má sjá forsetahjónin fyrir framan minnisvarða sem var komið upp í Pennsylvaníu vegna árásanna 11. september 2001.
Netverjar tóku eftir undarlegu mynstri aftan á kápu Melaniu úr smiðju fatahönnuðarins Hervé Pierre. Töldu netverjar að mynstrið minnti á atburðina í New York þegar flugvél var flogið á Tvíburaturnana og með því að klæðast þessari kápu væri Melania að senda einhvers konar skilaboð.
Í fréttum bandarískra fjölmiðla kemur fram að umrædd mynd hafi verið tekin á minningarathöfn árið 2018, en myndin fór þó ekki á flug á netinu fyrr en í þessari viku – einu ári síðar.
Fataval Melaniu Trump hefur lengi vakið athygli en hún þykir með sérstakan smekk. Sumir vilja meina að hún sendi ákveðin skilaboð með fatavali sínu þegar hún er í opinberum erindagjörðum með eiginmanni sínum.
Stephanie Grisham, talskona Hvíta hússins, sagði við fjölmiðla að allar vangaveltur um kápuna væru fáránlegar. Engin dulin skilaboð væru að finna í mynstrinu.