Tveir Hollendingar, sem halda úti vinsælli YouTube-síðu, lentu í tómu veseni þegar þeir stálust til að fara inn á lokað svæði í Nevada í Bandaríkjunum. Svæðið sem um ræðir er vel þekkt og heitir Area 51.
Um er að ræða svæði sem er á forræði bandaríska hersins. Mikil leynd hvílir yfir því hvaða starfsemi fer fram á svæðinu og hefur ófáum samsæriskenningum verið hent fram vegna þessarar miklu leyndar. Hefur því meðal annars verið haldið fram að bandaríski herinn stundi rannsóknir á geimverum og geimskipum sem brotlent hafa á jörðinni.
Mennirnir, Govert Savage og Ties Granzier, óku framhjá skilti þar sem vegfarendur eru sterklega varaðir við því að fara inn á svæðið. Þeir voru handteknir en síðar sleppt gegn 500 dollara tryggingu.
Savage og Granzier voru með dróna, tölvu og upptökubúnað meðferðis en þeir sögðu við yfirheyrslur hjá lögreglu að þeir væru á leiðinni á ráðstefnu í Nevada. Þess vegna væru þeir með allan þennan búnað.