Tveir þeirra, Ricky og Ralston Gabriel, sem eru báðir hálfatvinnumenn í knattspyrnu, voru á föstudaginn dæmdir í 14 ára fangelsi hvor fyrir sinn þátt í málinu. Bróðir þeirra, Reiss, var dæmdur í 18 ára fangelsi en hann var fundinn sekur í þremur málum til viðbótar málinu sem bræðurnir voru allir ákærðir í. CNN skýrir frá þessu.
Þríburarnir höfðu annars gert allt sem í þeirra valdi stóð til að forðast hinn langa arm laganna. Þeir voru í hópi átta manna sem voru ákærðir fyrir að hafa útvegað glæpamanninum Aron Thomas, sem er talinn stórhættulegur, vélbyssu og hlaðna skammbyssu í apríl 2017. Á vopnunum fannst DNA sem tengdi þríburana við málið.
En þar sem DNA bræðranna er eins var útilokað fyrir lögregluna að tengja þá alla þrjá við málið þrátt fyrir að lögreglan væri viss um að þeir hefðu allir þrír átt aðild að því.
„Þremenningarnir reyndu að notfæra sér að þeir líta eins út og að erfðaefni þeirra er eins til að sleppa við refsingu en mikil vinna rannsóknarlögreglumanna kom í veg fyrir að það tækist.“
Sagði Driss Hayoukane rannsóknarlögreglumaður hjá Scotland Yard.
Lögreglumenn fylgdu bræðrunum eftir við hvert fótmál og með þeirri vinnu og upplýsingum um símanotkun þeirra tókst að tengja þá alla þrjá við afhendingu vopnanna til Aron Thomas sem var dæmdur í lífstíðarfangelsi á síðasta ári fyrir önnur mál.
