67 ára bandarísk kona, Arlene Renna, fannst meðvitundarlaus á stofugólfinu heima hjá sér í Pleasant Valley í New York síðdegis á mánudaginn. Ekki tókst að bjarga lífi hennar en hundar hennar tveir höfðu ráðist á hana og bitið illa. Arlene var úrskurðuð látin á vettvangi.

New York Post skýrir frá þessu. Báðir hundarnir eru af tegundinni Coon en það er veiðihundategund sem er mikið notuð við veiðar á þvottabjörnum að næturlagi. Þeir voru fluttir í hundathvarf og mun dómari síðar taka ákvörðun um hvort þeir verða aflífaðir eða fái að lifa.

Ekki er vitað hversu lengi Arlene hafði átt hundana en þeim er lýst sem félagslyndum, rólegum og vinalegum af samtökum hundaeigenda.

Arlene var hjúkrunarfræðingur og átti þrjú börn.