Darrel Moll, 45 ára karlmaður í Columbia-sýslu í Wisconsin í Bandaríkjunum, hefur verið ákærður fyrir býsna óvenjulegar sakir. Moll er sakaður um að sviðsetja eigið mannrán – allt í þeim tilgangi að fá meðaumkun frá eiginkonu sinni.
Það var á miðvikudag í síðustu viku að Darrel hringdi í eiginkonu sína undir lok vinnudags. Darrel leigði skrifstofurými í umræddu húsi og sagði hann eiginkonu sinni að mannræningjar hefðu ruðst inn, bundið hann við stól og hótað honum lífláti ef hann greiddi þeim ekki ákveðna fjárhæð.
Eiginkona hans brást við með því að hringja í lögreglu sem kom á vettvang. Þar fannst Darrel bundinn við skrifstofustól. Það sem lögregla fann hins vegar ekki voru vísbendingar um að einhver hefði ruðst inn og haft í hótunum við Darrel.
Rannsókn lögreglu leiddi í ljós að Darrel og eiginkona hans höfðu átt í talsverðum erfiðleikum í hjónabandinu. Grunaði lögreglu að hann hefði sviðsett atburðarásina til að fá athygli eiginkonunnar. Er hann sagður hafa vonast til þess að hún kæmi á vettvang í stað þess að hringja á lögregluna.
Í frétt WKOW kemur fram að Darrel hafi játað við yfirheyrslur að hafa sviðsett atburðarásina. Hann var handtekinn í kjölfarið og verður hann meðal annars ákærður fyrir að sóa tíma lögreglu.