Mörgæsirnar Marama og Rocky hafa verið saman í 5 ár. Parið var valið af starfsfólki sædýrasafnsins til að ættleiða mörgæsaregg. Parið hefur nú verið að ala upp Gentoo mörgæsarungann síðan í júlí.
Stjórnendur SEA Life hafa ákveðið að komast í sögubækurnar þar sem þeir kusu að leyfa mörgæsarunganum að vera án kyns. Þetta verður fyrsti mörgæsarunginn í sædýrasafninu sem verður ekki skilgreindur eftir kyni.
Starfsfólkið segir að þetta sé eðlilegt meðal mörgæsa og annarra sjávardýra, mennirnir séu meira í því að skilgreina allt og alla.
Það var ákveðið að fara þessa leið þar sem það er náttúrlegt fyrir ungann að vaxa og dafna inn í fullorðinsárin án þess að hafa eitthvað ákveðið kyn.
Mörgæsarunginn hefur verið merktur með einstöku fjólubláu bandi svo umsjónarfólkið geti þekkt ungann frá hinum mörgæsunum.
Unginn er núna orðinn fjögurra mánaða gamall. Hann er búinn að missa allar barnafjaðrirnar og er orðinn tilbúinn í að verða fullgildur meðlimur í mörgæsaþyrpingunni.
Graham McGrath, stjórnandi í SEA Life garðinum segist vera stoltur af samkynhneigða mörgæsaparinu.
„Við erum afar stolt af Marama og Rocky sem tóku ungann undir sinn verndarvæng og hafa alið hann upp sem sinn eigin.“
Ástæðan fyrir því að Marama og Rocky fengu að ættleiða ungann er sú að mamma ungans fæddi tvö egg. Samkynhneigða parið fékk því að ala upp ungann til að létta undir hjá móðurinni.
Gentoo mörgæsir eru nánast í útrýmingarhættu þar sem loftslagsbreytingar hafa mikil áhrif á heimaslóðir þeirra.
Kynlausi mörgæsarunginn er einn af tveimur Gentoo ungum sem fæðst hafa í SEA Life London á þessu ári.
