Bandarískt par, sem var í fríi í Stokkhólmi nýlega, lenti í óskemmtilegri lífsreynslu þegar bíræfnir þjófar stálu úri frá manninum. Úrið sem um ræðir er ekki bara venjulegt armbandsúr heldur lúxus úr  frá Richard Mille sem er þekkt svissneskt fyrirtæki. Aðeins eru til nokkur eintök af úrum sem þessum og er verðmæti þeirra sem svarar til 32 milljóna íslenskra króna.

Sænska ríkisútvarpið skýrir frá þessu. það var síðdegis sunnudaginn 1. september síðastliðinn sem parið fór í gönguferð um miðbæ Stokkhólms. Fyrir framan Grand Hotel gáfu tveir menn sig á tal við manninn og báðu hann um að taka mynd af þeim með síma þeirra. Það vildi Bandaríkjamaðurinn gjarnan gera.

Þegar hann rétti mönnunum síðan símann aftur greip annar þeirra um handlegg hans og hélt þétt upp að líkama sínum og tók úrið af honum. Á meðan stillti hinn sér þannig upp að konan sá ekki hvað gekk á.

Parið hélt síðan heim á leið eftir helgina án úrsins góða sem þau höfðu kvittun fyrir og vottorð um að hér væri um ekta Richard Mille úr að ræða.