Josu Ternera, fyrrum leiðtogi basknesku hryðjuverkasamtakanna ETA, var handtekinn snemma í morgun í Frakklandi. Hann hafði verið eftirlýstur síðan 2002. Hann er talinn hafa staðið á bak við mannskætt hryðjuverk 1987.

Spænska innanríkisráðuneytið skýrði frá því í morgun að hann hefði verið handtekinn. Ternera var pólitískur leiðtogi ETA sem eru aðskilnaðarsamtök Baska en þau eru skilgreind sem hryðjuverkasamtök.

Spænsk yfirvöld telja að Ternera hafi staðið á bak við árás á lögregluskóla í Zaragosa á Spáni 1987. 11 létust í árásinni, þar á meðal mörg börn.

Spænska innanríkisráðuneytið sagði í morgun að Ternera hafi verið handtekinn „árla dags“ í Sallanches í Frönsku Ölpunum.

ETA myrti um 850 manns í vopnaðri baráttu sinni fyrir sjálfstæðu ríki Baska á norðanverðum Spáni og suðvesturhluta Frakklands.

Samtökin tilkynntu fyrir ári að þau hefðu ákveðið að leysa sig sjálf upp. Mánuði áður höfðu þau beðist afsökunar á þeim þjáningum sem þau hefðu valdið.