Í gær fannst piltur illa á sig kominn á gangi í Newport í Kentucky í um 800 km fjarlægð frá staðnum þar sem síðast er vitað um Timmothy. Vegfarendur tilkynntu lögreglunni um piltinn. Hann sagði lögreglumönnum að hann heiti Timmothy Pitzen og hafi verið rænt af tveimur mönnum fyrir átta árum.
Samkvæmt fréttum erlendra fjölmiðla eru lögreglumenn frá Illinois nú á leið til Cincinnati í Ohio, sem er nærri þeim stað þar sem pilturinn fannst, til að hitta hann. Talsmenn lögreglunnar hafa farið sér hægt í yfirlýsingum vegna málsins og segjast ekki hafa hugmynd um málavexti eða hvort hér er um gabb að ræða eða ekki. Mörg þúsund ábendingar hafi borist um Timmothy í gegnum árin og því sé full ástæða til að fara að öllu með gát.
Pilturinn sagði lögreglumönnum í Kentucky að honum hefði síðast verið haldið föngnum á „Red Roof Inn“ af tveimur mönnum. Það eru mörg módel með því nafni á þessu svæði og ekki er enn ljóst við hvert þeirra hann á. Lögreglumenn eru nú að rannsaka öll módel með þessu nafni á svæðinu.
Pilturinn segir að mennirnir tveir hafi ekið á Ford SUV með skráningarnúmerum frá Wisconsin.
Pilturinn var fluttur á sjúkrahús til aðhlynningar og rannsókna. Lífsýni var tekið úr honum til DNA-rannsóknar og segir lögreglan að niðurstaða rannsóknarinnar ætti að liggja fyrir eftir um sólarhring.
Alríkislögreglan FBI sagði í yfirlýsingu í gærkvöldi að hún væri að vinna að rannsókn málsins ásamt lögregluliðunum í Aurora, Cincinnati og Newport.