Óttast er að 32 hafi látist þegar eldgos hófst á eyjunni White Island undan ströndum Nýja-Sjálands í morgun. Staðfest hefur verið að fimm séu látnir og þá er margra til viðbótar saknað.

Talið er að um 50 manns hafi verið á eyjunni eða við hana þegar eldgosið hófst. Átján manns var bjargað eftir að eldgosið hófst og þar af voru nokkrir slasaðir, sumir voru með alvarleg brunasár. Viðbragðsaðilar sögðust í morgun „ekki sjá nein merki um líf“ á eyjunni sem þýðir að allt að 32 gætu verið látnir. Yfirvöld hafa þó ekki viljað staðfesta þessa tölu.

Talið er að um tuttugu ástralskir ferðamenn séu í hópi þeirra sem er saknað og þrír Bretar.

Viðbragðsaðilar hafa ekki lagt í björgunaraðgerðir þar sem aðstæður á eyjunni eru taldar mjög hættulegar. Þyrlur hafa þó flogið yfir eyjunni og hafa þær ekki séð merki um að neinn sé á lífi.