Íbúar í New South Wales í Ástralíu geta ekki gert annað en beðið eftir rigningu til að slökkva þá miklu gróðurelda sem nú loga í fylkinu. Rob Rogers, slökkviliðsstjóri fylkisins, segir að það muni taka margar vikur að slökkva eldana og það gerist ekki fyrr en það rignir mikið.

Sky skýrir frá þessu. Einnig kemur fram að sumir eldanna séu svo stórir að þeir „séu einfaldlega of stórir til að hægt sé að slökkva þá nú“.

Ástralska veðurstofan segir að eldarnir sendi mikinn reyk frá sér og liti himininn appelsínugulan. Reykur hefur legið yfir Sydney undanfarnar vikur og eru loftgæðin í borginni ekki upp á marga fiska.

Eldarnir hafa fram að þessu eyðilagt rúmlega 600 íbúðarhús og sex manns, hið minnsta, hafa látið lífið.

Reiknað er með enn frekari þurrkum og hitum á næstu vikum svo hætt er við að eldarnir muni loga áfram langt fram á næsta ár.