Fiona Hill, sem er sérfræðingur í málefnum Rússlands, kom nýlega fyrir rannsóknarnefnd bandarísku fulltrúadeildarinnar sem vitni í rannsókn deildarinnar á meintum embættisbrotum Donald Trump forseta. Hill var áður aðalsérfræðingur Hvíta hússins í málefnum Rússlands.

Hún sagði þingnefndinni að varast þyrfti samsæriskenningu, sem Trump og stuðningsfólk hans hefur sett fram, sem snýst um að stjórnvöld í Úkraínu hafi reynt að hafa áhrif á forsetakosningarnar 2016.

„Þetta er uppspuni sem á rætur að rekja til rússneskra leyniþjónusta sem hafa dreift þessu.“

Hún sagðist sammála niðurstöðum bandarískra leyniþjónustustofnana að það hafi verið Rússar en ekki Úkraínumenn sem stóðu á bak við herferð 2016 til að hafa áhrif á niðurstöður forsetakosninganna. Hún varaði jafnfram við að Rússar væru nú að undirbúa sig undir að endurtaka leikinn í kosningunum á næsta ári.

Rússnesk stjórnvöld hafa þvertekið fyrir að hafa haft nokkur afskipti af kosningunum.

Samsæriskenningin um að Úkraínumenn hafi skipt sér af kosningunum 2016 var meðal þess sem Trump bað úkraínsk stjórnvöld um að rannsaka fyrr á árinu. Auk þess bað hann þau um að rannsaka mál sem snúa að Joe Biden, fyrrum varaforseta, sem gæti orðið andstæðingur hans í kosningunum á næsta ári.