Sky skýrir frá þessu. Segir miðillinn að Bolsonaro, sem er hægrisinnaður þjóðernissinni og popúlisti, hafi nýleg vikið að DiCapri þegar hann ávarpaði stuðningsmenn sína.
„Þessi Leonardo DiCaprio er svalur náungi, er það ekki? Gefur peninga til að hægt sé að kveikja í Amazon.“
Mörg þúsund eldar, margir af mannavöldum, hafa herjað á Amazon undanfarna mánuði. Bolsonaro lét þessi orð um DiCaprio falla í tengslum við áskanir á samfélagsmiðlum um að náttúruverndarsamtökin World Wildlife Fund (WWF) hafi greitt slökkviliðsmönnum fyrir ljósmyndir af baráttunni gegn skógareldunum í Amazon til að nota til fjáröflunar.
DiCaprio var í tengslum við þetta sagður hafa gefið 300.000 dollara til samtakanna. Hann hefur neitað því. Fyrrnefndir slökkviliðsmenn voru handteknir í síðustu viku, sakaðir um að tengjast íkveikjum og fjárplógsstarfsemi. Þeir voru látnir lausir skömmu síðar eftir hávær mótmæli almennings en engar sannanir liggja fyrir um að fyrrnefndar samsæriskenningar eigi við rök að styðjast.
DiCaprio segist ekki hafa gefið fé til WWF en hefur lýst yfir stuðningi sínum við baráttu „íbúa Brasilíu fyrir að varðveita náttúru sína og menningu“. WWF vísa einnig ásökununum á bug og segja þær ekki eiga við nein rök að styðjast.
Fyrr á árinu gáfu náttúruverndarsamtök DiCaprio, Earth Alliance, 5 milljónir dollara, til hjálpar regnskógunum.
Bolsonaro hefur ítrekað ráðist á náttúruverndarsinna og samtök sem hafa látið málefni Amazon til sín taka. Hann hefur meðal annars sakað náttúruverndarsinna um að hafa farið til Amazon til að kveikja elda. Hann hefur þó ekki getað lagt fram neinar sannanir fyrir þessu.
DiCaprio svaraði ásökunum Bolsonaro í gær og skrifaði á Instagram:
„Framtíð þessara óbætanlegu vistkerfa er í húfi og ég er stoltur af að styðja þau samtök sem vernda þau. Ég mun halda áfram að styðja frumbyggja Brasilíu, yfirvöld, vísindamenn, kennara og fólk sem vinnur stöðugt að því að bjarga Amazon til að tryggja framtíð allra Brasilíumanna.“