Söngkona Blondie, Debbie Harry, virðist ekki hafa efnast mikið á velgengni hljómsveitarinnar sem hefur selt 40 milljónir eintaka af hljómplötum sínum á heimsvísu. Hún ræddi þetta nýlega við Daily Mail og skóf ekki utan af hlutunum.

„Tónlistarkona eða hóra? Ég hefði örugglega þénað meira ef ég hefði orðið hóra en ekki söngkona.“

Sagði hún. Hún sagði að hljómsveitarmeðlimir hefðu farið illa út úr lélegum plötusamningum.

„Við vorum ekki fyrsta hljómsveitin sem var svikin og ekki sú síðasta. Það nístir mann í hjartað að hafa þrælað í sjö ár án þess að fara í frí, selt milljónir hljómplatna og standa síðan uppi með ekkert.“

Sagði þessi 74 ára tónlistarkona.

Blondie sló í gegn á miðjum áttunda áratugnum. Debbie Harry var söngvari hljómsveitarinnar og kyntákn, nokkurskonar Marilyn Monroe tónlistargeirans.