Fyrir opnum tjöldum háir eitt ríkasta par Asíu nú biturt og harkalegt skilnaðarstríð. Eftir rúmlega 30 ár saman eru Chey Tae-won og eiginkona hans Roh Soh-yeong að skilja. Hún krafðist skilnaðar á miðvikudaginn og krefst sem svarar til um 150 milljarða íslenskra króna frá eiginmanni sínum.

Hann er ekki á flæðiskeri staddur því hann erfði eina stærstu fyrirtækjasamsteypu Suður-Kóreu á sínum tíma, SK Group, sem á tæplega 100 fyrirtæki. Hlutur hans í samsteypunni er 29,6 prósent en hlutur eiginkonunnar er aðeins 0,01 prósent. Ef fallist verður á kröfu hennar mun hún ráða yfir 7,8 prósentum hlutafjár í fyrirtækinu og þar með breytist valdajafnvægið innan þess mikið.

Skilnaðurinn kemur svo sem ekki á óvart að sögn fjölmiðla í Suður-Kóreu því lengi hefur verið vitað að Chey Tae-won á barn með annarri konu og hefur lengi viljað skilnað en Roh Soh-yeong hefur aldrei viljað fallast á það, þar til nú.

Í skilnaðargögnunum segir hún að hún sé reiðubúin til að leyfa manni sínum „að finna þá hamingju sem hann þráir svo mjög“. En fyrir það þarf hann að greiða háar fjárhæðir.