Á gamlárskvöld eru Ástralir meðal fyrstu þjóða heims til að fagna nýju ári enda landið framarlega í tímabeltaröðinni. Af þeim sökum fara myndir af hinni stóru flugeldasýningu í Sydney sigurför um heiminn á meðan við hin bíðum eftir að nýja árið gangi í garð.

En eins og flestir vita eflaust þá hafa miklir gróðureldar herjað á landið undanfarnar vikur og af þeim sökum vilja margir að peningarnir, sem á að nota í flugeldasýninguna, verði notaðir í skynsamlegri hluti. Um 120.000 manns hafa nú skrifað undir áskorun um þetta á change.org. Vill fólkið að peningarnir verði frekar notaðir til að styðja við bakið á bændum og slökkviliðsmönnum. Hér er ekki um neina smáaura að ræða því sýningin í Sydney kostar sem svarar til um 500 milljóna íslenskra króna.

Almenningur má ekki skjóta upp flugeldum í Ástralíu og því er flugeldasýningin í Sydney sérstaklega glæsileg ár hvert. Hún laðar líka fjölda ferðamanna til landsins. Clover Moore, borgarstjóri, vill ekki blása sýninguna af en hefur lofað að nota tækifærið til að safna peningum til neyðaraðstoðar við þá sem hafa farið illa út úr þurrkum og eldum.