Þetta var í annað skipti á skömmum tíma sem hann braut gegn nálgunarbanninu. Fyrir nokkrum mánuðum var hann dæmdur í fjögurra mánaða óskilorðsbundið fangelsi fyrir að hafa sent henni rúmlega 1.500 tölvupósta síðan nálgunarbannið var sett á í janúar. Þeim dómi var áfrýjað til Landsréttar og því hefur hann ekki hafið afplánun hans.
Eftir að nýi dómurinn hafði verið kveðinn upp, þann 29. nóvember, var maðurinn látinn laus því hann hafði setið í gæsluvarðhaldi svo lengi að hann hafði afplánað refsinguna. Hann lofaði dómaranum að hann myndi ekki setja sig í samband við konuna á nýjan leik. En það loforð hélt ekki lengi því aðfaranótt 4. desember réði hann ekki lengur við sig. Hann var þá ofurölvi og sendi konunni þrjár peningamillifærslur með farsímagreiðsluforritinu Mobilepay, hver þeirra var upp á 2 krónur danskar en það svarar til um 36 íslenskra króna.
Það var engin tilviljun að hann sendi henni tvær krónur. Fyrir fjórum árum hélt konan framhjá honum með yfirmanni sínum sem var einnig í hjónabandi. Hann gaf henni tvær krónur sem áttu að vera tákn giftingarhrings þar til þau gætu gengið í hjónaband. Maðurinn hefur síðan þá margoft kallað konuna tveggjakrónu hóru.
Maðurinn var handtekinn á nýjan leik að morgni 4. desember og færður fyrir dómara sem úrskurðaði hann í fjögurra vikna gæsluvarðhald. Hann féllst á kröfu lögreglunnar þar um en í henni kom fram að maðurinn hefði á kerfisbundinn hátt ofsótt konuna og að það væri enginn vafi á að hann myndi halda því áfram ef hann gengi laus.
