Sumir eru reiðubúnir til að ganga mjög langt til að tryggja sér aukaþægindi í flugferðum. En það er hægt að ganga of langt í þessu og því komst kona nokkur frá Flórída nýlega að. Hún vildi fá stærra sæti í flugvél frá American Airlines. Þegar vélin var komin á loft sagði hún áhöfninni að hún væri veik og þyrfti að fá stærra sæti.

Flugstjórinn tók meintum veikindum konunnar svo alvarlega að hann sneri við og lenti aftur í Flórída til að hægt væri að koma konunni undir læknishendur. En þá kom í ljós að hún var alls ekki veik. NBC News skýrir frá þessu.

„Þegar vélin var á lofti sagði hún áhöfninni að hún vildi fá stærra sæti. Flugstjórinn tók þessu mjög alvarlega  og ákvað að öryggislenda. Þegar vélin var lent sagði konan að hún hefði logið til um heilsu sína til að fá stærra sæti.“

Sagði Mike Wood, fjölmiðlafulltrúi lögreglunnar í Pensacola, í samtali við NBC News.

Þegar vélin var lent neitaði konan að fara frá borði. Á endanum tókst þó að telja hana á að yfirgefa vélina. Hún var síðan handtekin og úrskurðuð í gæsluvarðhald þar sem líkur eru taldar á að hún geti ógnað eigin öryggi sem og öryggi annarra.

Flugvélin gat síðan haldið för sinni áfram eftir tveggja klukkustunda seinkun.