Rússneski herinn hefur flutt 26 háþróaða skriðdreka að landamærum Rússlands, Noregs og Finnlands. Þetta hefur orðið til þess að Norðmenn eru nú að endurmeta varnir landsins á þessu strjálbýla landsvæði nyrst í landinu.

TV2 skýrir frá þessu. Fram kemur að skriðdrekarnir séu af gerðinni T-80BVM en þeir eru að sögn rússneska hersins sérhannaðir fyrir aðstæður á norðurslóðum. Vél þeirra á að geta farið í gang í 40 stiga frosti og hámarkshraði þeirra er 70 km/klst. Fallbyssur þeirra draga þrjá kílómetra. Skotfærin eru með úrankjarna sem gerir kúlunum kleift að fara í gegnum brynvörn á tveggja kílómetra færi segir Military Today.

TV2 hefur eftir Per Espen Strande, talsmanni norska hersins, að þessi vígbúnaðaraukning Rússa á svæðinu sýni hversu mikla þörf norski herinn hefur fyrir nýja skriðdreka hið fyrsta. Nútíma skriðdrekar séu afgerandi hluti fyrir hvern þann her sem vill láta taka sig alvarlega.