Starbucks, sem er stærsta kaffihúsakeðja heims, hefur kynnt til sögunnar nýja tegund kaffihúsa. Þessum kaffihúsum er ætlað að mæta þörfum þeirra sem eiga mjög annríkt. Viðskiptavinir eiga ekki að panta kaffi í þeim eins og venjan er á kaffihúsum keðjunnar. Þeir eiga bara að sækja kaffið sitt þangað. Áður hafa þeir pantað kaffið í gegnum app.

CNN skýrir frá þessu. Fyrsta verslunin af þessari gerð opnaði á þriðjudaginn í New York nærri Penn Station neðanjarðarlestarstöðinni. Nýju verslanirnar heita „Starbucks Pick-Up“.

Talskona fyrirtækisins sagði að viðskiptavinir muni njóta „hentugleika og þæginda“ í verslununum sem séu sérstaklega hannaðar til að uppfylla þessi atriði. Hún sagði að verslunin eigi einnig að vera „fyrirsjáanleg og auðveld“ fyrir viðskiptavini sem hafi þörf fyrir að geta sótt mat og drykk hratt í annríki dagsins.

Nýja verslunin er um 300 fermetrar að stærð en það er töluvert minna en hefðbundnar Starbucks verslanir sem eru um 550 fermetrar. Það eru engin borð eða stólar í henni enda er lagt upp með að viðskiptavinir fari þegar þeir hafa fengið kaffið sitt.