Sjómaður sem var á humarveiðum úti fyrir ströndum Maine í Bandaríkjunum fékk heldur óvenjulegan afla um borð á dögunum. Maðurinn, Ren Dorr, var staddur um átta kílómetra frá landi þegar hann varð var við eitthvað sem buslaði í sjónum.

Þegar betur var að gáð reyndist vera um að ræða lifandi hreindýr sem virðist hafa villst eitthvað af leið. Um var að ræða kálf og brugðust Ren og félagar hans um borð skjótt við og komu kálfinum um borð í bátinn.

Ljóst er að ekki mátti miklu muna að kálfurinn dræpist, enda var hann orðinn nokkuð þrekaður eftir volkið. Kálfurinn var hinn rólegasti þegar um borð var komið og hélt sig til hlés eins og myndin hér að neðan ber með sér. Kálfinum var komið í land við Harrington um hálftíma síðar – frelsinu eflaust feginn.