Marco Minniti, fyrrum innanríkisráðherra Ítalíu, var í forsvari þegar ESB samdi við Líbíustjórn um að draga úr flóttamannastraumnum til Evrópu. Hann óttast nú að hernaðaraðgerðir Tyrkja í Sýrlandi verði til þess að Líbíusamningurinn fari út um þúfur og mörg þúsund liðsmenn Íslamska ríkisins eigi þá greiða leið til Evrópu.

Minniti óttast að liðsmenn Íslamska ríkisins haldi til Líbíu frá Sýrlandi og reyni síðan að komast til Evrópu. Það er ekki til að draga úr áhyggjum hans að Erdogan, Tyrklandsforseti, hefur hótað að opna flóðgáttir flóttamanna og senda allt að 3,6 milljónir flóttamanna til Evrópu.

Hótanir Erdogans og áhyggjur Minniti eru skýrt dæmi um að áratugalangar tilraunir Evrópu til að draga úr flóttamannastraumnum til álfunnar hvíla á viðkvæmum grunni og ekki þarf mikið til að allt hrynji til grunna.