Ef það var markmið Dorsey að valda Mark Zuckerberg, forstjóra Facebook, höfuðverk í síðustu viku þá var þessi ákvörðun hans vel til þess fallinn. Hann tilkynnti að frá 22. nóvember muni Twitter ekki leyfa birtingu á pólitískum auglýsingum, hvorki í Bandaríkjunum né annarsstaðar.
„Það er ekki trúverðugt fyrir okkur að segja að við leggjum hart að okkur við að stöðva fólk í að misnota kerfið okkar til að dreifa röngum upplýsingum en á sama tíma geti fólk borgað okkur fyrir að beina pólitískum auglýsingum að ákveðnum hópum og geti þá sagt það sem því sýnist.“
Sagði Dorsey í langri Twitterfærslu. Hann varaði einnig við hættunni sem lýðræðinu stafa af markvissum auglýsingum á samfélagsmiðlum.
Hann nefndi Facebook ekki einu orði en það er erfitt að skilja orð hans öðruvísi en svo að hann sé að vísa til fyrirtækisins. Þetta hefur aukið þrýstingin á Zuckerberg í yfirstandandi deilum og átökum um áhrif þessara tveggja samfélagsmiðlarisa á bandarísk stjórnmál. Zucekerberg hefur verið í miklum mótvindi síðustu tvær vikur eftir að hann sagði að Facebook myndi ekki staðreyndakanna þær pólitísku auglýsingar sem birtar eru á miðlinum en það er gert við allt annað álíka efni. Þetta þýðir einfaldlega að fyrirtækið getur grætt peninga á að birta auglýsingar sem byggja augljóslega á lygum eða eru misvísandi.
Donald Trump, forseti, hefur nú þegar nýtt sér þetta og birt auglýsingu með óstaðfestum ásökunum í garð Joe Biden fyrrum varaforseta. Facebook neitaði að fjarlægja auglýsinguna þegar kosningastjórar Biden fóru fram á það. Zuckeberg hefur fært þau rök fram að einkafyrirtæki eigi ekki að setja sig í dómarasæti um hvaða stjórnmálamenn eigi að ritskoða. Hann kom fyrir þingnefnd í Washington nýlega þar sem hann sagði meðal annars að Facebook telji mikilvægt að í lýðræðisríkjum geti fólk sjálft dæmt stjórnmálamenn út frá því sem þeir segja.
Gagnrýnendur segja að Zuckerberg hafi ekki lært af hneykslinu í tengslum við forsetakosningarnar 2016 en þá var Facebook í aðalhlutverki í leynilegum aðgerðum rússneskra stjórnvalda til að snúa kosningunum Trump í vil. Það mun því verða aukinn þrýstingur á Facebook að breyta afstöðu sinni en hvort svo fer er erfitt að segja til um enda miklir fjárhagslegir hagsmunir undir.
Þetta var í raun ódýr ákvörðun hjá Twitter því fyrirtækið hefur ekki haft nærri því eins miklar tekjur af pólitískum auglýsingum og Facebook. Repúblikanar og demókratar eyða til dæmis um einni milljón dollara á viku í birtingu á auglýsingum á Facebook. Auglýsingum sem er markvisst beint að ákveðnum hópum.