Niðurstöður nýrrar rannsóknar sýna það sem flestir vissu kannski fyrir, að karlar falla helst fyrir konum sem láta líkamsþyngdina hvíla á öðrum fætinum. Rannsóknin er þó lítil því aðeins 68 manns tóku þátt í henni.

Samkvæmt niðurstöðunum er það góð leið fyrir konur sem vilja ganga í augun á hinu kyninu að láta líkamsþyngdina hvíla á öðrum fætinum og um leið sveigja efri hluta líkamans örlítið. Þetta virkar meira aðlaðandi á karla samkvæmt niðurstöðum rannsóknar vísindamanna við University of British Columbia í Kanada. The Guardian skýrir frá þessu.

Vísindamennirnir gerðu þrívíddarmyndir af konum og sýndu 68 manns af báðum kynjum. Á meðan fólki virti myndirnar fyrir sér voru augnhreyfingar þess skráðar nákvæmlega. Báðum kynjum fannst kona, sem hvíldi líkamsþyngdina á öðrum fæti, meira aðlaðandi en þó voru fleiri karlar en konur þessarar skoðunar.

Niðurstöður rannsóknarinnar hafa verið birtar í Archives of Sexual Behavior.