Rannsókninni var hætt fyrir tæpu ári af því að fimm börn höfðu fæðst andvana og eitt lést í móðurkviði. The Guardian skýrir frá þessu. Haft er eftir forsvarsmönnum rannsóknarinnar að þeir hafi ekki talið siðferðislega forsvaranlegt að halda rannsókninni áfram. Það var Sahlgrenska háskólasjúkrahúsið í Gautaborg sem stóð fyrir henni.
Konunum, sem tóku þátt í henni, var boðin þátttaka þegar þær voru gengnar 40 vikur. Þeim var skipt í tvo hópa. Hjá öðrum hópnum voru fæðingar settar af stað í 42. viku meðgöngu en hjá hinum viku síðar nema fæðingin færi fyrr af stað af eðlilegum orsökum.
Þegar rannsókninni var hætt höfðu vísindamennirnir náð fjórðungi af þeim fæðingum sem átti að ná. Niðurstöður þess hluta sem framkvæmdur var er að það sé mikil hætta á dauðsföllum ef fæðingar eru ekki settar í gang fyrr en á 43. viku meðgöngu. Öll dauðsföllin áttu sér stað hjá konunum sem voru settar af stað í þeirri viku meðgöngunnar.
Fjallað var um málið í sumar en vísindamennirnir, sem unnu að rannsókninni, vildu ekki birta niðurstöður hennar eða tjá sig um hana fyrr en búið væri að birta niðurstöðurnar í vísindariti. En nú hefur einn þeirra fengið doktorsritgerð sína, sem byggist á rannsókninni, birta á heimasíðu Gautaborgarháskóla og því er umræðan aftur farin af stað.
Í doktorsritgerðinni er komist að þeirri niðurstöðu að ekki eigi að láta konur ganga með börn lengur en 41 viku. Talsmenn Sahlgrenska sjúkrahússins sögðust fyrir helgi ætla að breyta verklagi sínu vegna þessarar niðurstöðu og framvegis verði fæðing sett af stað á 41. viku meðgöngu.