Fangi einn í Iowa í Bandaríkjunum, Benjamin Schreiber, var dæmdur í lífstíðarfangelsi án möguleika á reynslulausn fyrir morð árið 1997. Benjamin berst nú fyrir frelsi því hann vill meina að hann sé búinn að afplána dóminn. Hann hafi nefnilega dáið árið 2015.
Málið er allt hið undarlegasta en í frétt Washington Post kemur fram að Schreiber hafi fengið nýrnasteina í mars 2015. Veikindin ágerðust og fékk hann alvarlega blóðsýkingu í kjölfarið.
Þess er getið að áður en þetta gerðist hafði Schreiber látið í ljós þá skoðun sína að ekki ætti að endurlífga hann ef hann færi í hjartastopp. Hafði hann skrifað undir pappíra þess efnis. Það er skemmst frá því að segja að Shcreiber var fluttur meðvitundarlaus á sjúkrahús nokkru síðar. Hann fór í hjartastopp – fimm sinnum í það heila – en var ávallt endurlífgaður, meðal annars með adrenalíni.
Í apríl 2018 fór Schreiber formlega fram á það að verða leystur úr haldi. Hjarta hans hefði jú stöðvast þremur árum áður og tæknilega séð hefði hann dáið. Undirréttur í Iowa hafnaði beiðni hans og áfrýjunarréttur staðfesti þann úrskurð á miðvikudag. Í úrskurðinum segir að Schreiber sé enn á lífi og hann þurfi að dúsa í fangelsi þar til hann raunverulega deyr.