Aðfaranótt 1. september síðastliðinn voru tveir karlar um tvítugt og unnusta annars á leið heim úr miðbæ Randers í Danmörku eftir næturskemmtun. Skyndilega réðust tveir menn á þau á grimmdarlegan hátt. Árásarmennirnir, sem eru 17 ára, lömdu og spörkuðu í fólkið og linntu ekki látum fyrr en þeir höfðu náð öllum peningum þeirra af þeim en það voru 63 danskar krónur í heildina en það svarar til um 1.200 íslenskra króna.

Eitt fórnarlambið var slegið í andlitið og hrint í götuna en hitt fékk hnefahögg í andlitið og var ógnað með glerflösku. Árásarmennirnir náðust og hlutu nýlega dóm fyrir málið. Lögreglan fann þá fljótlega eftir árásina og voru þeir þá með 11 krónur á sér.

Þeir voru báðir dæmdir í níu mánaða fangelsi. Annar mannanna er tyrkneskur ríkisborgari og var honum einnig vísað úr landi og má ekki koma til Danmerkur næstu sex árin.