Miri er þekktur leiðtogi glæpagengis í Bremen og hefur hlotið fjölmarga dóma fyrir ýmis afbrot. Það voru einmitt þessi afbrot og dómar sem urðu til þess að honum var vísað úr landi. Weser Kurier segir að yfirvöld hafi staðfest að Miri sé kominn aftur og hafi verið handtekinn.
Hann var handtekinn fyrir nokkrum dögum á skrifstofu útlendingaeftirlitsins í Bremen Nord hverfinu í Bremen. Þangað var þessi 46 ára glæpaforingi kominn til að sækja um hæli. Hann segir að herskáir sjítar ógni öryggi hans og velferð í Líbanon.
Talið er að hann hafi komið til Þýskalands nokkrum dögum áður en hann var handtekinn. Hann var hvorki með vegabréf né vegabréfsáritun.
Sakaskrá hans er ansi löng. Hann hefur meðal annars hlotið dóma fyrir skipulögð fíkniefnaviðskipti og um hríð var hann leiðtogi Bremendeildar skipulögðu glæpasamtakanna Gremiums, sem eru starfrækt undir því yfirskini að um mótorhjólaklúbb sé að ræða. Á valdatíma Miri í klúbbnum skýrðu þýskir fjölmiðlar frá því að aðeins einn eða tveir meðlimir ættu mótorhjól. Miri var dæmdur í sex ára fangelsi 2014 fyrir fíkniefnabrot en var látinn laus til reynslu 2018.
Þýsk yfirvöld telja að hann hafi árum saman verið leiðtogi Miri-gengisins sem voru samtöku um 3.000 afbrotamanna.
Miri er ríkisfangslaus Palestínumaður sem kom til Þýskalands 13 ára að aldri á miðjum níunda áratugnum.
Þýsk yfirvöld höfðu árum saman reynt að koma honum úr landi en það tókst ekki fyrr en í sumar.