Tóbaksframleiðandinn British American Tobacco (BAT) á stóran þátt í að börn í Malaví vinna við tóbaksræktun. Þetta segja 2.000 tóbaksræktendur sem segja að BAT greiði svo lítið fyrir tóbakið að þeir verði að láta börn vinna við ræktun þess.

Tóbaksræktendurnir hafa fengið breska lögmannsfyrirtækið Leigh Day til að aðstoða sig í baráttunni við BAT og munu þeir flytja málið fyrir hæstarétti Bretlands. Oliver Holland, lögmaður hjá Leigh Day, segir að á meðan hagnaður BAT sé gríðarlegur fái bændurnir, sem sjái um það hættulega og erfiða starf að rækta og tína tóbak, nær ekkert í sinni hlut.

Þeir ömurlegu samningar sem bændurnir gera við BAT þýði að þeir þurfi að láta börn hætta í skóla og vinna 10-12 tíma á dag við tóbaksræktunina.

20.000 til 35.000 bændur stunda tóbaksrækt í Malaví. Algengt er að börn vinni þar í landi. Í skýrslu SÞ frá því á síðasta ári kemur fram að allt að 2,1 milljón barna, allt niður í 5 ára, vinni þar í landi.

Bandaríska tollgæslan tilkynnti á föstudaginn að allur innflutningur á tóbaki frá Malaví hafi verið stöðvaður vegna málshöfðunarinnar.