Fjölskyldu einni í Pittsburgh í Bandaríkjunum brá í brún þegar í ljós kom hvaðan óþefurinn kom sem blossaði upp í fjölskyldubílnum á dögunum.
Holly Persic hafði fundið einskonar brunalykt og heyrt grunsamleg hljóð í bílnum sem hún ákvað að kanna nánar. Hún ákvað að opna húddið þegar hún lagði bíl sínum við bókasafn eitt í Pittsburgh og fékk þá vægt áfall. Undir húddinu var íkornafjölskylda búin að fela valhnetur í hundraðatali – væntanlega sem geymslustað fyrir komandi vetur.
Eiginmaður Holly, Chris, segir við CNN að Holly hafi hringt í hann dag einn fyrir skemmstu og talað um skrýtinn óþef, einskonar brunalykt og grunsamleg hljóð. „Ég sagði henni að opna húddið og þá sendi hún mér þessa mynd,“ segir hann en umrædda mynd má sjá hér að neðan.
Það tók Holly og Chris um klukkutíma að fjarlægja hneturnar og annað sem íkornarnir höfðu dregið með sér undir vélarhlífina. Sem betur fer urðu engar skemmdir á bílnum en íkornarnir þurfa að finna sér betri felustað næsta vetur.