Samkvæmt ákvörðun Donald Trump, forseta, munu Bandaríkin taka við 18.000 flóttamönnum á þessu ári. Þetta er minnsti fjöldi flóttamanna, sem Bandaríkin taka við, síðan byrjað var að taka á móti flóttamönnum samkvæmt opinberri aðgerðaáætlun í upphafi níunda áratugarins. Á síðasta ári var tekið á móti 30.000 flóttamönnum.

Í tilskipun sem Trump gaf út á föstudaginn segir hann að fækkun flóttamanna sé „réttlætanleg vegna áhyggna af stöðu mannúðarmála og sé tekin með hagsmuni þjóðarinnar að leiðarljósi“.

Þetta þýðir að Bandaríkin munu taka á móti 4.000 flóttamönnum frá Írak, 1.500 frá El Salvador, Gvatemala eða Hondúras. 12.500 pláss eru frátekin fyrir fólk sem óttast ofsóknir vegna trúarsannfæringar sinna, þátttöku í pólitísku starfi og af öðrum ástæðum.

Mike Pompeo, utanríkisráðherra, sagði í yfirlýsingu að kjarninn í utanríkisstefnu ríkisstjórnar Trump sé að sú skyldi hvíli á stjórnvöldum að taka ákvarðanir byggðar á raunveruleikanum, ekki óskum. Hægt sé að ná besta árangrinum með því að byggja á beinhörðum staðreyndum.

„Þegar við tökumst á við þau vandamál, sem hrekja flóttamenn frá heimilum sínum, hjálpum við miklu fleira fólki og miklu hraðar en ef við látum það setjast að í Bandaríkjunum.“

Sagði hann einnig.

Á síðasta ári Barack Obama á forsetastóli, árið 2016, heimilaði hann 85.000 flóttamönnum að koma til landsins. Trump skar þá tölu niður í 53.000 á fyrsta ári sínu í Hvíta húsinu.