Ethan Landers vissi að eitthvað mikið væri að þegar hann vaknaði við sáran verk í öðrum úlnliðnum nótt eina fyrir skemmstu. Ethan átti Fitbit-snjallúr sem hann svaf með á sér umrædda nótt og reyndist það vera sökudólgurinn.

Ethan var fljótur að átta sig á því að úrið hafði brætt úr sér – hreinlega sprungið –  með þeim afleiðingum að hann hlaut þriðja stigs brunasár. Ethan, sem er búsettur í Iowa í Bandaríkjunum, sagði frá þessu í Facebook-færslu sem vakið hefur mikla athygli.

„Ég var fljótur að átta mig á því að Fitbit-úrið var hreinlega að bráðna þannig að ég reyndi í örvæntingu minni að ná því af mér,“ segir hann. Eiginkona hans vaknaði við hamaganginn, kveikti ljósið og tókst henni loks að ná úrinu af honum.

Eðli málsins samkvæmt var Ethan sárþjáður enda var tilfinningin eins og úrið væri að brenna í gegnum úlnliðinn á honum. Þau hjónin höfðu samband við hjúkrunarfræðing sem ráðlagði þeim að fara beint á bráðamóttökuna. Eftir skoðun læknis kom í ljós að Ethan þyrfti á húðágræðslu að halda.

Forsvarsmenn Fitbit segjast meðvitaðir um málið og það sé til skoðunar hvað fór úrskeiðis. „Öryggi okkar viðskiptavina er í fyrirrúmi og við tökum þetta mjög alvarlega.“