Emmanuel Macron, Frakklandsforseti, er ekki hrifinn af hugmyndum um að þar í landi verði janúar mánuður „þurr“. Það er að segja að mánuðurinn verði notaður til að vekja athygli almennings á þeim hættum sem geta fylgt því að drekka óhóflega mikið áfengi.

Samtök franskra vínframleiðenda eru ekki hrifin af þessari hugmynd og virðist Macron vera sama sinnis. Sky skýrir frá þessu. Hugmyndin að „þurrum janúar“ er sótt yfir Ermasund til Bretlands þar sem almenningur er hvattur til að sleppa því að drekka áfengi í janúar.

Talsmaður samtaka kampavínsframleiðenda sagði í samtali við Vitisphere, sem er tímarit um franska víniðnaðinn, að Macron hafi fullvissað samtökin um að hann styðji ekki „þurran janúar“. Þessi orð lét talsmaðurinn falla í tengslum við fréttir um að franska lýðheilsustofnunin sé að undirbúa herferð fyrir þurrum janúar.

Vínframleiðendur hafa áhyggjur af að verða af miklum tekjum ef herferðin verður sett af stað og segja að iðnaðurinn eigi nú þegar í vök að verjast og ekki bæti herferð sem þessi úr skák.