Á þriðjudaginn voru Alfred Chestnut, Andrew Stewart og Ransom Watkins látnir lausir úr fangelsi í Baltimore. Þar höfðu þeir setið saklausir í 13.149 daga eða 36 ár. Þeir voru dæmdir fyrir morð á 14 ára pilti 1984.

Mál þeirra var tekið til meðferðar á nýjan leik á síðasta ári og nú hafa yfirvöld komist að þeirri niðurstöðu að skelfileg mistök hafi verið gerð þegar þremenningarnir voru sakfelldir fyrir morðið. CNN skýrir frá þessu.

Það var hinn 14 ára DeWitt Duckett sem var skotinn í hnakkann þegar hann var á leið í skóla 1984. Jakka hans var síðan stolið. Lögreglan gerði fjölda mistaka við rannsókn málsins. Marilyn Mosby, aðalsaksóknari Baltimore, segir að þremenningarnir hafi verið dæmdir því lögreglan og saksóknarar hafi markvisst ætlað að sakfella þessa þrjá svörtu drengi. Önnur ungmenni hafi verið neydd til að gefa rangar upplýsingar við yfirheyrslur.

„Ég lít ekki á daginn í dag sem sigur heldur sem hörmungar og við verðum að axla ábyrgð á þessu.“

Ein stærstu mistökin í rannsókninni voru að sögn að lögreglan og saksóknarar hunsuðu og leyndu mörgum vitnaframburðum sem báru kennsl á fjórða manninn sem morðingjann. Hann lést 2002.

Þremenningarnir voru handteknir á þakkargjörðardaginn 1984 og sátu í fangelsi allar götur síðan þar til þeir voru látnir lausir á þriðjudaginn.