Margar klámstjörnur og aðrir sem starfa í kynlífsiðnaðinum eru ósáttir við framgöngu Instagram á þessu ári. Samfélagsmiðillinn hefur eytt aðgöngum margra úr þessum hópi og segjast þeir ekki njóta jafnræðis á við aðra.

BBC skýrir frá þessu.

„Ég ætti að geta verið með Instagram eins og til dæmis Sharon Stone eða aðrir sem eru með samþykkta Instagramaðanga. En í raun er aðgangi mínum eytt.“

Er haft eftir Alana Evans sem er forseti samtaka klámmyndaleikara, Adult Performers Actors Guild. Hún er leiðandi í baráttu klámstjarna fyrir að fá að vera áfram á Instagram. Hún hefur tekið saman lista með nöfnum rúmlega 1.300 klámstjarna sem segja að Instagram hafi eytt aðgöngum þeirra á þeim grunni að brotið hafi verið gegn reglum miðilsins. Á engum þessara aðganga var sýnd nekt eða nokkuð tengt kynlífi.

BBC segir að mótmæli klámstjarnanna hafi orðið til þess að fulltrúar Instagram funduðu með þeim í júní. Þar náðist samkomulag um að stofnað yrði einhverskonar áfrýjunarkerfi fyrir aðganga sem hefur verið eytt. En þegar leið á sumarið lögðust samskipti fulltrúa klámstjarnanna og Instagram niður og áfram var haldið að eyða aðgöngum þeirra.