Á mánudaginn birti alþjóðalögreglan Interpol myndir af átta mönnum sem hún vill gjarnan hafa hendur í hári. Þeir eru allir grunaðir um alvarleg afbrot sem beindust gegn konum. Það eru sjö lönd sem lýsa eftir þeim, það eru: Rússland, Danmörk, Noregur, Úkraína, Brasilía, Bandaríkin og Kýpur.

Meðal hinna eftirlýstu er Mohammad Ayoub Jahangery, 28 ára, sem er grunaður um að hafa myrt eiginkonu sína í Hedehusene í Danmörku á síðasta ári. Hann er frá Afganistan en hafði búið árum saman í Danmörku. Hann hefur ekki náðst og því vill Interpol minna almenning á að hans sé leitað.

Interpol er alþjóðlegt lögreglusamstarf 194 ríkja sem aðstoða hvert annað við að upplýsa afbrot sem teygja sig yfir landamæri. Þar undir fellur það þegar grunaðir afbrotamenn flýja land.

Hér er hægt að sjá lista Interpol yfir mennina sem leitað er að.