Veturinn verður dimmur og kaldur á hlutabréfamörkuðum heimsins ef marka má spá stærsta vogunarsjóðs heims, Bridgewater. Sjóðurinn hefur veðjað rúmlega einum milljarði dollara á að verð á hlutabréfamörkuðum lækki á næstu þremur mánuðum.

Wall Street Journal skýrir frá þessu. Bridgewater er sagt hafa fengið Goldman Sachs og Morgan Stanley, ásamt fleirum, til að veðja á að lykilvísitölur á borð við S&P 500 og Euro Stoxx 50 lækki fyrir 1. mars.

Þetta bendir til að sjóðurinn eigi ekki von á að lausn finnist á viðskiptastríði Bandaríkjanna og Kína á næstunni. Þetta stríð hefur staðið yfir mánuðum saman og hefur haldið hlutabréfamörkuðum heimsins í heljargreipum.

En þrátt fyrir að Bridgewater hafi lagt einn milljarð dollara undir þá er það aðeins brot af þeim peningum sem sjóðurinn er með í vörslu sinni en í heildina er hann með um 150 milljarða.