Snemma á miðvikudagsmorguninn réðst Lundúnalögreglan til atlögu við glæpahring í borginni. Grunur leikur á að hann hafi smyglað um 15 milljónum punda, sem nemur um tveimur milljörðum króna, úr landi í ferðatöskum og hafi peningarnir verið fluttir til Dubai. Hald var lagt á reiðufé, fíkniefni og lúxusbíla á borð við Range Rover, Audi og BMW.

Talsmaður the National Crime Agency (NCA) sagði að meðlimir glæpagengisins væru grunaðir um að vera félagar í „vel skipulögðu samsæri“ um að þvætta milljónir punda sem væru ágóði fíkniefnasölu og smygls á fólki á undanförnum þremur árum.

Gengið er einnig grunað um að hafa smygla 17 innflytjendum til Bretlands síðasta sumar. 41 árs karlmaður, sem er talinn höfuðpaurinn, var handtekinn auk fimm Indverja, eins Frakka og fjögurra Breta á aldrinum 28 til 44 ára.

Samkvæmt frétt Sky komst lögreglan á snoðir um starfsemi glæpagengisins þegar landamæraverðir lögðu hald á 1,5 milljónir punda fyrr á árinu.