Hvort fólk kann að lesa eða ekki getur skipt máli þegar kemur að því að forðast að fá elliglöp þegar aldurinn færist yfir. Þetta er niðurstaða nýrrar rannsóknar kanadískra vísindamanna.

Niðurstöður rannsóknar þeirra voru nýlega birtar í tímaritinu Neurology. Fram kemur að þeir hafi rannsakað 938 fullorðna, eldri en 65 ára, sem búa í Washington Heights í New York og hafa ekki lengri skólagöngu að baki en fjögur ár.

Vísindamennirnir heimsóttu fólkið og gerðu margvíslegar rannsóknir á minni fólksins, málnotkun og fleiru. Þeir gerðu einnig elliglapa mat á fólkinu út frá hefðbundnum viðmiðum.

Þeir sem eru ólæsir komu verst út úr prófunum. Þeir sem höfðu hvorki lært að lesa né skrifa reyndust tæplega þrisvar sinnum líklegri til að þjást af elliglöpum en þeir sem geta lesið.

Vísindamennirnir segja að ein af ástæðunum fyrir þessu geti verið að þeir sem læra ekki að lesa séu með minni hugræna starfsemi en þeir sem eru læsir.

Rannsóknin er hluti af langtímarannsókn sem hefur staðið yfir síðan 1992. Vísindamenn hafa á þeim tíma rætt við 6.500 íbúa í Washington Heights þegar þeir voru komnir á efri ár.