Andrew kom fram í viðtali við BBC á laugardaginn þar sem reyndi að útskýra samband sitt við Epstein sem var eitt sinn dæmdur í 13 mánaða fangelsi fyrir hórmang. Eitt af meintum fórnarlömbum Epstein, Virginia Giuffre, sagði árið 2015 að hún hefði þrisvar verið neydd til kynlífs með prinsinum en því neitaði hann í viðtalinu.
En þrátt fyrir að prinsinn hafi nú stigið til hliðar telja margir sérfræðingar að skaðinn sé skeður fyrir bresku konungsfjölskylduna. Í gær skýrðu sumir bresku fjölmiðlanna síðan frá því að Andrew hefði stigið til hliðar eftir að móðir hans og Karl bróðir hans höfðu beitt hann miklum þrýstingi um að gera það.
Jonny Dymond, sérfræðingur BBC í málefnum konungsfjölskyldunnar, sagði að mörgum spurningum væri enn ósvarað um peninga og titla í þessu máli og hvort Andrew muni koma við sögu í frekari rannsókn á málum Epstein.
„En nú er niðurlægingin algjör. Hann fæddist inn í kastljósið en dregur sig nú í hlé frá því og konungsdæmið stendur eftir skaddað.“
Christopher Wilson, sem hefur skrifað margar ævisögur um meðlimi konungsfjölskyldunnar, sagði að Andrew hafi ekki dregið sig of snemma í hlé. Það muni taka mörg ár að bæta það tjón sem hann hafi valdið konungsfjölskyldunni.
Í yfirlýsingu sem Andrew sendi frá sér á miðvikudagskvöldið lýsti hann yfir samúð með fórnarlömbum Epstein, eitthvað sem hann gerði ekki í sjónvarpsviðtalinu. Hann sagðist jafnframt harma samband sitt við Epstein. Hann sagðist einnig reiðubúinn til að aðstoað við rannsóknina á málum Epstein.