Á mánudaginn var þekktur maltneskur kaupsýslumaður handtekinn á snekkju sinni grunaður um að hafa staðið á bak við morðið. BBC skýrir frá þessu. Maltneskir fjölmiðlar segja að kaupsýslumaðurinn heiti Yorgen Fenech og hafi verið að reyna að flýja frá Möltu á snekkju sinni þegar hann var handtekinn.
Handtakan kom í kjölfar undirritunar Joseph Muscat, forsætisráðherra, á samningi sem veitti manni, sem var grunaður um morðið, sakaruppgjöf gegn því að hann veitti upplýsingar um hver stóð á bak við það.
The Independent segir að Fenech sé forstjóri fyrirtækjasamsteypu sem vann útboð um byggingu stórrar gasstöðvar fyrir sex árum.
Galizia hafði fjallað um elítuna á Möltu en hún skrifaði meðal annars um mútur, spillingu og skattaskjól. Hún afhjúpaði meðal annars að fyrrnefndur Joseph Muscat forsætisráðherra, hafi þegið mútur frá fólki í Aserbaísjan. Múturnar fékk hann greiddar inn á reikning í skattaskjólinu Panama. Þetta mál þótti stórt hneyksli en samt sem áður sigraði Muscat í næstu kosningum.
Samkvæmt frétt The Telegraph hafði Galizia rannsakað dularfullt fyrirtæki í Dubai, sem tengist Fenech, nokkrum mánuðum áður en hún var myrt. Fyrirtækið er sagt hafa tengsl við marga maltneska stjórnmálamenn. Grunur lék á að fyrirtækið væri notað til að múta stjórnmálamönnum.
