Stefan Löfven, forsætisráðherra Svíþjóðar, er í eldlínunni þessa dagana eftir að hann vék sér undan því í viðtali í sænsku sjónvarpi að tengja hina miklu glæpaöldu og starfsemi glæpagengja í landinu við innflytjendur. Löfven sagði að ekki ætti að tengja umræðuna við ákveðna samfélagshópa. Eftir mikinn þrýsting frá flokkssystkinum sínum í jafnaðarmannaflokknum og frá stjórnarandstöðunni skrifaði hann færslu á Facebook þar sem hann viðurkenndi að aðlögun innflytjenda að sænsku samfélagi sé undir þrýstingi.

„Það er hætta á glæpum.“

Skrifaði Löfven.

Áður en hann skrifaði þetta hafði Göran Dahlström, flokksbróðir hans og bæjarfulltrúi í Katrineholm, sagt í samtali við Expressen að hann, sem sjónarvottur að því sem er að gerast, væri ekki í vafa um hverjir ættu hlut að máli. Hann gagnrýndi Löfven fyrir að segja ekki skýrt að vandinn tengdur glæpagengjunum tengist hinum mikla straumi flóttamanna til Svíþjóðar.

„Það er á samfélagsmiðlum, hjá áberandi vinstrimönnum og hjá jafnaðarmönnum ákveðin tilhneiging til að telja að það sem ég og flokkurinn í Katrineholm stöndum fyrir sé rasískt.“

Ulf Kristersson, leiðtogi Moderaterne, skrifaði á Facebook að flokkur hans bæri einnig ábyrgð á þeirri innflytjendastefnu sem hefur verið við lýði í Svíþjóð en nú verði Löfven að axla ábyrgð og horfast í augu við raunveruleikann.

„Það er jú augljóst að glæpagengin, skotárásirnar og morðin tengjast alltof miklum fjölda innflytjenda og lélegri aðlögun þeirra að samfélaginu sterklega.“

Skrifaði hann.