Það er orðið ansi langt síðan menn stigu síðast fæti á tunglið en það var þegar áhöfn Apollo 17 heimsótti þennan trúfasta fylgifisk okkar í desember 1972. Áhöfnin tók jarðvegssýni með sér heim til jarðarinnar. Sýnin voru innsigluð og hafa verið í öruggri geymslu hjá bandarísku geimferðastofnunni síðan.

Í fréttatilkynningu frá NASA kemur fram að sýnin hafi verið opnuð þann 5. nóvember síðastliðinn í fyrsta sinn síðan þau komu til jarðarinnar.

Sýnin voru geymd í alla þessa áratugi í þeirri von að tækninni myndi fleygja svo mikið fram að unnt yrði að rannsaka sýnin enn betur en hægt var á áttunda áratug síðustu aldar.

Rannsóknirnar á þeim núna beinast að því að undirbúa rannsóknir og greiningar á sýnum sem á að taka í hinu svokallaða Artemis-verkefni en samkvæmt því á að lenda á tunglinu 2024.

Flest sýnin, sem Apollo geimförin komu með til jarðarinnar, hafa fyrir löngu síðan verið rannsökuð ofan í kjölinn en nokkur voru geymd til síðari tíma eins og áður sagði.

Áætlað er að opna fleiri gömul sýni frá tunglinu í janúar á næsta ári.