Door Dash er þriðja stærsta fyrirtæki heims hvað varðar heimsendingu á mat. Fyrirtækið er með starfsemi um alla Norður-Ameríku en markaðsverðmæti þess er rúmlega 10 milljarðar dollara. En nú er Karl Racine, saksóknari í Washington D.C., á eftir fyrirtækinu.

Hann hefur stefnt því fyrir að hafa kerfisbundið svikið matarsendlana um milljónir dollara í þjórfé á undanförnum árum og að hafa svikið viðskiptavini með þessu.

Málið hófst í mars þegar saksóknari hóf rannsókn á því eftir grein sem birtist á vefsíðunni Recode. Þar kom fram að allt það þjórfé sem viðskiptavinirnir höfðu greitt fyrirfram í gegnum app fyrirtækisins hafi ekki verið greitt til sendlanna heldur hafi það verið notað í launagreiðslur starfsfólks.

Í stefnu saksóknara kemur fram að þetta orki tvímælis, sé ruglandi og villi um fyrir viðskiptavinum sem séu hvattir til að greiða þjórfé án þess að þeim sé kynnt að það skili sér ekki til sendlanna.