Nýlega fannst karlmaður um áttrætt látinn í íbúð sinni í Stokkhólmi. Lögreglan telur að um þrjú ár séu síðan hann lést. Það var nágranni mannsins sem gerði leigusala þeirra viðvart því honum fannst svo langt um liðið síðan hann sá manninn síðast.

Dagens Nyheter hefur eftir nágrannanum að hann hafi margoft kíkt inn um bréfalúguna hjá manninum og hafi furðað sig á öllum póstinum sem lá á gólfinu.

Lögreglan telur að miðað við póstinn, það sem var í ísskápnum og dagatal mannsins séu um þrjú ár síðan hann lést.  Sænska ríkisútvarpið hefur eftir talsmanni lögreglunnar að maðurinn hafi líklegast dáið snögglega, kveikt hafi verið á útvarpinu hans.