Foreldrar unglingspilts sem svipti sig lífi hafa ákveðið að stefna erkibiskupsdæminu í Detroit í Bandaríkjunum vegna ummæla sem prestur lét falla í jarðarför piltsins.
Presturinn sem um ræðir notaði tækifærið til að velta upp þeirri spurningu hvort pilturinn, hinn átján ára Maison Hullibarger, færi til himna í ljósi þess að hann hafði svipt sig lífi.
„Við áttum bágt með að trúa þessum orðum,“ segir Jeff Hullibarger, faðir Masons í samtali við Detrot Free Press. „Hann stóð þarna uppi og fordæmdi son okkar og kallaði hann í raun syndara. Hann velti því upp hvort sonur okkar hefði unnið fyrir því að komast til himna og notaði orðið „sjálfsmorð“ (e. suicide) sex sinnum.“
Jeff og eiginkona hans, Linda, höfðu farið fram á að athöfnin yrði jákvæð en presturinn, Don LaCuesta, hefði virt þær óskir að vettugi. „Engir foreldrar, systkini eða fjölskyldumeðlimir eiga að þurfa að sitja undir því sem við þurftum að sitja undir,“ segir Linda.
Erkibiskupsdæmið í Detroit hefur beðist afsökunar á framferði prestsins og tilkynnt að hann muni ekki sjá um jarðarfarir framar. Málið kemur nú væntanlega til kasta dómstóla nema samkomulag um hugsanlegar bætur náist án aðkomu þeirra.