Í apríl á síðasta ári eltu starfsmenn norsku náttúruverndarstofunnar tvo vélsleðamenn í tvær klukkustundir í Loppa í Finnmörku. Þyrla var notuð við eftirförina sem stóð í tvær klukkustundir og lauk án þess að sleðamennirnir stoppuðu.  Þeir hunsuðu öll stöðvunarmerki, þar á meðal þegar þyrlunni var lent rétt fyrir framan þá. Þeir létu sig síðan hverfa á brott.

En hinn langi armur laganna hafði síðar upp á þeim og var það Instagram sem varð þeim að falli. Eftirlitsmenn náttúruverndarstofunnar skráðu nefnilega hjá sér öll bílnúmer á bílum og eftirvögnum á bílastæðum á svæðinu. Þeir fundu síðan út hverjir skráðir eigendur bílanna voru og leituðu síðan að þeim á samfélagsmiðlum. Á Instagram fengu þeir svörun og komust þannig að hverjir óku sleðunum umrætt sinn.

Í niðurstöðu þingréttar í Alta segir að enginn vafi leiki á hverjir óku sleðunum umrætt sinn því myndir af þeim hafi verið birtar á Instagram. Ökumennirnir voru dæmdir til að greiða 18.000 norskar krónur í sekt fyrir að hafa ekið án skráningarmerkja og að hafa ekki sinnt stöðvunarmerkjum.